يا أيُها المجنون عذراً وانا امون

مايعرفونك كلهم مثل ماعرفك

أنا جليسك ولك شاكر وممنون

على رصيف طول عمره موالفك

اتقلد الأصوات وتكوسر اللحون

من حالك الحكمه ماهي في سوالفك

وحكمتك تهديها على الي يمرون

لكن وين اللي ليا مر شايفك

العقل نعمه مير ماهوب مضمون

وش خانته لأطعت نفسك وخالفك

واصبحت لذنوبك مقيّد ومرهون

ولا انت منه بحل مالله مكلفك

خطاك ماهو في نواياك مقرون

ولاحدٍ يحملك العتب في تصرفك

واهل العقول الي تسميك مجنون

غاية مناهم ساعة الحشر موقفك

يكفيك يوم تقابل مكوّن الكون

عنك القلم مرفوع بيض صحايفك