ارْخَ الرّسن يا صاحب الخيل برفوق

مهرتك يا قلب المعنّى جموحي

لي عزةٍ تِطفي لهيب احمر الشوق

ماني بعَلى طرد المقفّي لحوحي

آطِي على قلبٍ كسير ومحروق

واطوي على عوج الحنايا طموحي

حتى لو القى الجمر في محّة المُوق

لَرَدِّد العين العزيزة تبوحي

اعزّي الشوق بخيالٍ يجي ذوق

عينٍ على فرقى المحبة سفوحي

واروّح النفس الحزينة من العوق

روحي على ذكر المودة تنوحي

عزاه يا قلب يتوق اعظم التَّوق

يا صاحبي خلك علينا سموحي

غض النهد يفداه من يلبس الطوق

لو كان بالوصل المحبّب شحوحي

ما شفت مثله في البريّات مخلوق

خدًّه كما برقٍ شعاعه يلوحي

لولا الحيا والدين سقت القدم سوق

وافادي النفس العزيزة بروحي

واشكي لواعجْ في المحبة لمعشوق

حيث المواصل بلسمٍ للجروحي

مير اذكره ربٍّ نهاني عن البوق

ابغَى المواصَل بالحلال النصوحي

الفالح الي من خطاياه معتوق

ربي حفظ لي سلعتي لا تروحي

ارجي عسى الله يكتبه لا ارتَحَل فوق

لا ضاعت الهقوة بعينٍ تفوحي