يا الله طلبتك مزنةٍ تبعد الياس

سيلٍ تحَدّر لين ضَكّ المسيلة

يا ما حلا يا صاحبي فَكّة اعماس

على طعوسٍ غاسلتها المخيلة

يا الله طلبتك يا كريمٍ بلا قياس

أنت العزيز وكلِّ خلقك ذليلة

أشكي عليك ومالي شكوى على الناس

مِن راح للمخلوق ضيّع حصيله

يا اللهِ لا تتكل فقيرك على الناس

لا تاخذه بالذنب وانته وكيله

يا طير يا اللي مبعدٍ خلف الاطعاس

وصِّلْ جوابٍ مِن خليل لخليله

بلّغ سلامي عِدّ شوقي والانفاس

أم سليمان اللي بقلبي نزيلَه

واقطِفْ معك وردٍ مِن البَرِّ ما انداس

واحذف عليها زهرةٍ من مِسيلَة

واخبرها عن حالِه ترى القلب منحاس

والباقعة ماله سبيلٍ وحيلة

ثوَاه همٍّ شَيَّبَ العين والرّاس

تكفين يا يمّه تراها عليلة

همٍّ بِدَا مع ساقته راح الاحساس

اقفى سَعَدْهَا وراح يُومِي شِلِيلِه

ان كان همّه مِن ورا العجز والياس

فدوَاه يصبرْ لين يبرد غليله

والا سبب حاله عديمات الاجناس

مات الشجاع بسيفِ عينٍ ظليلة

والّا سببْ مِن وَرَّدَ السّمِّ في الكاس

كاس الرفيق اللي فعوله جليلة

والّا خلا جيبه من الدّرّ والماس

همَّ الفقيرِ اللي لوا عزّتي له

والّا سبب قوله عن الذنب لا باس

لين افسِدَتْ قلبه ذنوبٍ ثقيلة

واختامها صَلِّي على هادي الناس

نبيّنا يا سعد منهو دليله