طَارَ الكَرى والخفوق اليوم مرتاعي

والرّوح بتفارق الجثمان مفجوعة

يا خالد افديك ما صدّقت ذا النّاعي

قال النّخل شَوف عينك تِلَّت جذوعه

قمت اتهشّم واهلّ الدّمع ملتاعي

يوم قاطعةْ دفتر الدّيّان مقطوعة

يا معجبة وين عِزّك اللي ينشاعـي

يا قرّة العين تِلّ القلب مِن قوعه

كم من ضعيف يقول القصر مهزاعي

لا داج في معجبة راح الظّما وجوعه

تنصاك ناس عَكَفْها الوقت جيّاعي

لا قيّض الحَرِّ صِرتي فيه ينبوعه

لا صَدَّرَوا حَمَّلُوا من تمرك اشباعي

يا الله جزاء الآخرة في جنان مرفوعة

المشتكى للذي ما عنه مفزاعي

يا الله رحمتك لاهل القصر وربوعه

يا قصر وين اختك اللي تِثْقِل الصّاعى

قال امّكم زارها طويل مذروعه

وتقول عقب الاحبة عفت ذا القاعي

راحوا قِطيني وكلٍّ يلحق ربوعه

هذي هي الدّار ما تبقى لِجَمّاعِي

من طال عمره لا بدّ الموت بيصوعه

عشنا وشفنا وصار املنا خَدَّاعي

ما كن عُمري بطول سنينه اسبوعه

يا قَصْرِنا وين عزّك جالك الدّاعي 

اقفيت عنّا وصرت اخبار مجموعة

يا ما درج فيك من نشميّ مطاعي

ويا ما من احسان منه الروس مرفوعة

كم خَيِّر وخَيِّرَةً يوم عِزَّكُم ذاعي

عاشوا زمان الهنا واحقاد منزوعة

يا ما حلا نغمة الترتيل والدّاعي

يا ما سجد مسلم يسقيك بدموعه

ورى «المِجَبَّب» مع «سحيران» صِدَّاعي

و«مرَبَّعَة» تذكر الخلّان مجزوعة

«مصباحنا» و«العلالي» فيه مهجاعي

و«عشاشِ» فيها الطرايف دوم مبدوعة

مع «غَمْيَة التّمر» يا حلو اللي ينباعي

ومن يطلب الزاد ما هي بممنوعة

كَرَم وطيبة وحسن اخلاق ما تباعي

اخلاقهم فطرةٍ ما هي بمصنوعة

عسى خبر هدَّكُم مِن كذبة السّاعي

يا شين حوقان كَانِه هِدِّ مِن قوعه

يا قصرنا قِدْمِنا السكران ملتاعي

قام يتوجّد ويقول ابيات مسموعة

يا سامع النصح جعلك بالعقل واعي

ما صاب ربعي بيجيك منه قرطوعه

وين الجميلة لقطها الموت بسراعي

حتى العرين العريض يكسَّر فروعه

حذراك تتبع ضعيف الدين منصاعي

ابا الفيت ما يفرق الكرسوع من بوعه

يا صاحبي وين زادك قرَّبَ الداعي

عساه بيعجلك لجنان مزروعة

ساعتها كل امخبور منك قد ضاعـي

لا حشرجت في الصدر ثم حَنَّت ضلوعه

وصلاة ربي مع التسليم للداعي

حتى النخل من حنينه حَنَّت جذوعه