يا ريم يا مزيونة الخدِّ والعين

يا ريم لا تِبكِين خالك وداعة

وش جاك يا ريمه علامك تونّين

اقري عليّ خطٍّ كثير البراعة

يا ريم دلّيني على ابوك ذا الحين

ووصّلي خطّي زعول القطاعة

يا صاحبي ما لي من العذر تبيين

ولا عندي غير الهمّ وقلّ السناعة

ما قصدي هجر ولا نويت التهاوين

ومجرّد التفكير فيها بشاعة

عمّي غلاته من زمانٍ وذا الحين

يا كثر شوقي للغلا واجتماعه

يا كثر تقصيري من شهور وسنين

والمشتكى لله في كلّ ساعة

هذاك عمّي خَذْ من الصبر حظّين

ومن نافسه في الحلم ظفّف شراعه

الله يعوضه بالرّضا والبساتين

في جنة الفردوس دار الرفاعة

يا عمّ صبرك والمقادير بتزين

باذن الولي سُقمِك ثوابٍ وطاعة

دنيا النكد ما تسوى لو نظرة العَين

والرابح اللي باعها بالبضاعة

بضاعة الرحمن دارٍ بها العِين

وانهار خمر وغيرها من متاعه

يا الله غوثك يا مغيث المحيلين

ويا كاشف البلوى توَمِّنْ مَرَاعه

يا من شفيت ايوب عقب الطواعين

تشفي مريض طال عنا انقطاعه

في الرياض ربعه ذاقوا الهمِّ والبِين

وأم الجميع تمدّ كفّ الضراعة

يا رب واحبابه من اجله حزينين

هو الحبيب اللي يا زين اجتماعه

وصلاة ربي عدّ اذان المواذين

على رسولٍ فوزنا في اتّباعه