يا طير يا اللي في الجديدة سنحني

بلّغ سلامي للقرايب والاحباب

وصّل سلامي والدي وابكِ عنّي

قل له ترانا في الوَعَر بين الاغراب

كان الزمن يمشي عليكم فكنّي

وقتي وقف في ساعته والزمن غاب

ليا شفت طيرٍ فوق الاشجار حَنّي

كنّ الخفوق يجاذبه ساقي النّاب

لي ونّةٍ مثل النّجر حين دَنّي

ونَّة كسيرٍ بين الاخصام منصاب

لو سمعها حِبّ الضنى كان يجنِّي

يا الله دعيتك واللي يسألك ما خاب

لو سمعها الطير الحَدَبْ ما يغنّي

باسباب شوقٍ في الضماير له اسباب

أخايل البرق الجنوبي واظنّي

مع شاعِق الصبح القريب اطرق الباب

واشمّ ريح الشاذليّة واثنّي

وابرد غليلٍ فالحشا يلهب لهاب

واكحّل العين بشِفَاتي واهنّي

نورَ العيون اللي عليه الوَلَه ذاب

الوالدة مثل السحايب وكنّي

جدب الصحاري واللهايب لها انشاب

اطلب عسى الله بالفرج وارجِهِنِّي

والزَم رجول الوالدة والزمن طاب

يا الله طلبتك بالبشاير يجنّي

واحسن ختامي يا رجا كل طلّاب

واسْعِدْ وداعي واجتهادي وظنّي

واحسِن جوابي في القبر تحت الانصاب