عِزِّي لقلبٍ لوّعَتْه المقادير

ما هو بعَلَى فرقى المواليف قاوي

سلام أعذى من طلول النواوير

في خايعٍ ما داج فيه المعاوي

هبت نسايم نجدنا بالتباشير

ريح الخزامى والعرارة يداوي

زعَجْت صوتي يا سليل المناعير

يا صامل الهدّات يوم اللقاوي

ما رَفّ جفنك كيد حمر الطوابير

والهقوة انك فوق ذيك الهقاوي

عطني جوابك في كثير التفاكير

لا عاف راسه طيّبات القهاوي

تلهب عظامه صارمات المناشير

وتصلى فواده مزعجات الشقاوي

لولا يقينه بالفرج والتدابير

كان النهاية مثل موت العطاوي

يشوف صَلْوَ الحرب طال المغاوير

ما كنكنوا لا يبس ريق الهواوي

هي السعادة في دلال مباهير

خَطْوَ العرين اللي نَخَلْه متساوي؟

والا السعادة في نياقٍ مغاتير

في عِبْلةٍ ما قلقلوها الشواوي؟

والا السعادة في جيادٍ مظامير

خيلٍ عرايب مطربات الشفاوي؟

والا السعادة في حبارٍ مذاعير

لهدّف القرناس ما هوب ياوي؟

والا السعادة مع شباب مسافير

رفقة نِقَى والطِّيْب معهم يخاوي

والا السعادة في مسيلٍ بغادير

تُرْبِهْ عَذِيْ في جَرْهِدِيٍّ خلاوي؟

والا السعادة في حنين المواطير

عَشِّقْ دِبَل والا فياجراً سماوي؟

والا السعادة في القصور المظاهير

مع الغَضِي في مستراح النداوي؟

والا السعادة في الحريم المجاوير

قرّات عينٍ ضافيات الغطاوي؟

والا السعادة في قدوم المسايير

رِكْزَتْ عصاهم عند بابٍ حفاوي؟

والا السعادة عند راع المناكير

دربه حرامٍ غارقٍ في البلاوي؟

والا السعادة في طراد الغنادير

حبايل الشيطان والشر ناوي؟

والا السعادة في غَنَاةَ المعاسير

يسرح بدون أزواد والخير ضاوي؟

والا السعادة في جهاد الطوابير

ضرب الرصاص معجلات المثاوي؟

والا السعادة عند نثر المعاذير

في سجدةٍ بالليل وقت الشكاوي؟

دوِّرْ عليها في صحيح التفاسير

وعجّل بردك يا صريح العزاوي