غنى حمام الورق من فوق الافناد

ذكر علي مافات مبطي وموجود

يالله يامنشي نسانيس الانواد

ياللي نصر موسى وعيسى وداود

يامدبر الدنيا على كيف ماراد

ياخالق المخلوق ياخير معبود

تفرج لمحزون جلاه التلهاد

يبكي على غال(ن) كلا جسمه الدود

علم لفاني تالي الليل لا عاد

من يوم قال مناحي مات مسعود

عفت الكرى والنفس صامت من الزاد

على فقيد راح ياخير مفقود

صبرت صبر ايوب والصبر مافاد

قلبي معه عاده على النهد مولود

اصبر وقلبي فيه صادر و وراد

اذل يلحقني من الناس منقود

اتلى العهد به يوم حطوه بلحاد

دبرت كني منه مقفي ومطرود

يبكي اليتيم وحرمته لبست احداد

وقلبي غدى كنه على النار ماقود

وعيني تهل الدمع مزل له زاد

كني ضعيف من ضناياه مضهود

واكرر الونات وابكي بالاجهاد

واسهر توالي الليل والعالم رقود

واحط راسي وارقب الصبح ينقاد

عساه ياتيني بشير بمسعود

والعين عيت ماتبي نوم ورقاد

ولو زينوا لي فوق زل وماهود

ماعاد لي عقبه مع الناس مقعاد

هذي حياة شنعة مابها فود

راح الرفيق اللي لنا حصن وسناد

كفو يشيل الحمل حتى لو انه كود

انا اشهد انه من مناعير الاولاد

لاهو بذوال ولاهو بمقرود

مخرب مالزمت ايده وما فاد

يشبح لعز الراس ما يبغي الزود

ياجعل له في جنة الخلد ميعاد

لي جاء نهار فيه شاهد ومشهود

صلوا على خير البشر سيد الاسياد

ما شعشع البارق وما هبت النود