كلهن سولفتهن لو بعد منهن؟؟
شد عيني بعصابه
واخذني مغمض اندلهن..
واندل وين مضمومات
واعرف ليش دافنهن..
مثل شايب خلص عمره
وبقه بعود الصبى يدندن..
انه كلما الوذ بهالتقيه واضحك ويه الناس
دمعاتي علي تفتن..
شفت قصر الاماره ويم عبيد الله
تلاگه المستحيل هناك والممكن..
الجسد عالگاع....والراس بطشت... والجامع يأذن..
وصدى ذيچ الشتايم من حرب صفين
من فوگ المنابر وأذني تسمعهن..
ومن طعنة علي ... الفجر بالمحراب
شكو نجمات دمّن باللطم خدهن..
ودخان المخيم بعد جواه نار
ومن طبع الجروح التعتك تخزن..
كل ما نسأل التاريخ... ياهو اليستحي منهن
يدفن راسه بچفوفه
يكول هواي بچّني وسجلهن ضاع
ومضيّع دفاترهن..
عدا ذيچ الاجساد الطاهره الظلت ثلث تيام
ومن ذاك النزف
صار التراب بكربلاء يئن..
عدا چفوف الگمر عباس
ما ذب رايته واچفوف اديه ذبهن..
عدا سوط الشمر حرّك ثنايا حسين
مدري شجاوبنه وبالعجل سدهن..
عدا عيون الفواطم من مشت للشام
عين اعله التراب ...
وعين تربي لجسد والدهن..
عدا السجاد فوگ النوگ
واديه من السلاسل ظل ينّث دمهن..
ومعرسين والزفهم طلع جناز
ومعرسات والحنه بعدهي بطرف اصابعهن..
واگبور النجف ... والغرّبوا بالليل
والگصّن گصايبهن..
ونعوش الاطفال التنحمل ... مو فوگ سيارات
چن رب السمه .... ببساط شايلهن..
عدا اطلوگ الحوامل بالشته ... بالواحد وتسعين
گبل ايّامهن والقصف جيّبهن..
كل ما نسأل التاريخ
ياهو التستحي منهن؟
يگول هواي بچّني وبچه وياي الانس والجن..
هدوم حسين لسه مبللات بدم
على حبال الشمس بيده النبي شرهن.....