(1)
نوال ...واكتبك : بنتٍ تدخل امرايه
ف..المشط تصعد....وحلم المشط : ينزل به
شوفي : حرقت اصبعي من نار غلاّيه
والشاي ....لو بارد الفنجال : أكمّل به
طفّايتي : يتم.........ماهي بسّ طفّايه
سجايري : حزن...........من قال انها علبه ؟
أدخلك : طالب تلعثم في حروف آيه
واخشاب كل الكراسي ..بارده...صلبه
قولي : عرفني ولد صايع .....بلا غايه
قولي : ولاني نوال ان ما أهبّل به...!
( 2 )
ساعة جدار : معلّقه........قل : بعيده
سكنت هالغرفه ...وهي جات بعدي
دولاب فخم....وكم ملابس جديده
أكشخ بها ...وآقول من عاد قدّي
نفس الزمن...والأكل...نفس القصيده
قالت : وش اللّي فيك ..ونسيت ردّي !
والصفحه اثنعشر ..بهذي الجريده
اشعر بها ...لكن شويّ وتعدّي
والله..وغصّة هالسرير الوحيده
أنه سرير اثنين....وآنا لوحدي !!
( 3 )
نوال...لاتسكتي...وتكلّمي واجد
تكلّمي : أكذب الأشيا...هو الأصدق
حزين انا ...وأسألي لو صاحبي ماجد
عن وحدة الساعة خمسة الفجر...في فندق !
( 4 )
يعني متعكّر مزاجي....وآه كم حاجه تعكّر
يعني موناقص كلام الناس....موناقص قرف
قل : حزين الليل...قل : ليل الوحيد اللّي يفكّر
كم من الراتب يوفّر...كم من الراتب : صرف
مايجيك الاّ انت...تفتح باب هالغرفة...تسكّر
ياوحيد تعدّ .........كم حذيان قدّام الغرف...!
( 5 )
وربي ....واتصالات الرسبشن ...وآخري....ونعاس
تذكّرني نوال بشيّ.......كنّه شي يشبهني
كذا : يتحرك المعجون في وجهي....كذا : الأمواس
أثاريني كبرت ....وما لقيت اللّي ينبّهني
تقول أمي توجّهني : ولد اصحك تسبّ الناس
لقيت الناس لكنّي ...... فقدت أمٍ توجّهني !